Akademik litsey faoliyati haqida ma’lumot
Toshkent to‘qimachilik va yengil sanoat instituti akademik litseyi O‘zbekiston Respublikasi Oliy va O‘rta maxsus ta’lim vazirligi, o‘rta maxsus kasb – hunar ta’lim markazining 16.06.1998-yildagi 192-sonli buyrug‘i asosida tashkil etilgan bo‘lib, Yakkasaroy tumani Shohjahon ko‘chasi, 5/4-uyda joylashgan. Toshkent to‘qimachilik va yengil sanoat instituti akademik litseyi Davlat ta’lim standartlariga mos ravishda o‘rta maxsus ma’lumot beruvchi, o‘quvchilarning qiziqishi va imkoniyatlaridan kelib chiqib, chuqurlashtirilgan ta’lim yo‘nalishlari bo‘yicha o‘qitish, oliy ta’limga maqsadli yo‘naltirish, jadal intellektual rivojlanish bilan ta’minlovchi, shuningdek, maxsus chuqurlashtirilgan tayyorgarlikni talab etmaydigan alohida mutaxassislik beruvchi davlat ta’lim muassasasidir. Akademik litsey faoliyatini O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisi palatasj qarorlari, O‘zbekiston Respublikasi Prezidenti farmonlari, qarorlari, farmoyishlari, Vazirlar Mahkamasi qarorlari va farmoyishlari, O‘zbekiston Respublikasi Oliy ta’lim, fan va innovatsiyalar vazirligi qarorlari va buyruqlari, institut kengashi qarorlari va rektor buyruqlari, yo‘riqnomalari, ko‘rsatmalari ta’lim tizimiga oid me’yoriy-huquqiy hujjatlar, shuningdek, Ustav (Nizom) asosida amalga oshiradi.
Akademik litseyning asosiy maqsad va vazifalari quyidagilardan iborat:
Akademik litseyning maqsadi – o‘quvchilarni har tomonlama rivojlangan, madaniyatli shaxs sifatida shakllantirish, shuningdek, jamiyatda o‘zlarining mustaqil o‘rnini topish, ta’lim va kasblar bo‘yicha dasturlarni tanlash, ularni o‘zlashtirish uchun asos yaratish, fundamental ilmiy-nazariy asoslar nuqtai nazaridan puxta bilimga ega bo‘lishlari uchun shart-sharoit yaratish, shuningdek, shaxsning jismoniy va ma’naviy rivojlanishi uchun keng imkoniyatlarni ta’minlash, o‘quv jarayonining sifat va samaradorligini oshirish, o‘quvchilar bilim darajasini oshirishda institutning ilmiy salohiyatidan yanada kengroq foydalanishni tashkil etish, oliy ta’lim muassasalari o‘quv, ilmiy salohiyatidan, moddiy-texnik bazasi, ta’lim va axborot resurslaridan foydalanish, iqtidorli o‘quvchilarni qo‘llab-quvvatlash, ularni maqsadli ta’limga yo‘naltirish va pirovard natijada akademik litsey bitiruvchilarining oliy ta’lim muassasalariga maqsadli o‘qishga kirishini ta’minlash.
2023-2024-o‘quv yilida qabul qilingan litsey o‘quvchilari uchun ishchi o‘quv reja 2021-yil 1-martda Oliy va O‘rta maxsus ta’lim vaziri tomonidan tasdiqlangan namunaviy o‘quv reja asosida ishlab chiqildi. Kasbiy fanga ajratilgan soatlar O‘zbekiston Respublikasi Prezidentining 2017-yil 14-martdagi PQ-2829-son qaroriga muvofiq akademik litseylar bitiruvchilariga beriladigan mutaxassisliklar ro‘yxatiga asosan akademik litsey pedagogik kengashi qaroriga ko‘ra “Aniq fanlar-1”, “Aniq fanlar-2”, “Aniq fanlar-3” yo‘nalishlarda o‘quvchilar uchun “Texnik-dasturchi” va “Tabiiy fanlar-2” yo‘nalishidagi o‘quvchilar uchun “Texnik-kimyogar” mutaxassisliklarini o‘qitish belgilangan tartibda amalga oshirildi. Mutaxassislik bo‘yicha berilgan davlat namunasidagi sertifikat egallangan bilimlarni mehnat faoliyatida amalga oshirish huquqini beradi.
O‘zbekiston Respublikasi Vazirlar Mahkamasida “Besh tashabbus olimpiadasi”ning 2023-yil mavsumini yuqori saviyada tashkil etish bo‘yicha tadbirlar amalga belgilandi. Jumladan, “Sportning futbol, shaxmat va shashka turi bo‘yicha akademik litsey o‘vuchilari o‘rtasida hamda futbol bo‘yicha “Yevropa mamlakatlari” instituti bilan hamkorlikda o‘rtoqlik musobaqalari o‘tkazildi.
Bundan tashqari, “Besh tashabbus olimpiadasi” doirasida “Zakovat” intellektual o‘yinlari, “Kitob targ‘iboti” ruknidagi “Kitobdan dilim yayrar” hamda “Kitob – ma’naviyat ko‘zgusi” deb nomlangan tadbirlar o‘tkazildi. O‘quvchilarni informatika fanidan olgan bilimlarini mustahkamlash maqsadida “Kompyuter savodxonligi” to‘garagi tashkil etildi.
Akademik litsey rahbar va pedagoglar haqida ma’lumot
Akademik litsey tashkil topgan yildan 2004-yilga qadar f.f.n. X.I.Isaev, 2004-2005 yy. t.f.n. M.M.Saydamatovlar rahbarlik qilgan. 2005-yildan buyon akademik litsey direktori (2021-yildan ijrochi direktor) lavozimida t.f.n. U.T.Yuldasheva faoliyat yuritib kelmoqda.
Akademik litseyda 4 ta kafedra faoliyat yuritadi: Matematika-informatika kafedrasi, Tabiiy fanlar kafedrasi, Ijtimoiy-gumanitar fanlar kafedrasi, Xorijiy tillar kafedralari. Ushbu kafedralarda jami 36 nafar professor-o‘qituvchilar faoliyat olib bormoqda, jumladan, 5 nafar (fan nomzodi, PhD), 7 nafar bosh o‘qituvchi, 8 nafar yetakchi o‘qituvchi, 13 nafar katta o‘qituvchi hamda 7 nafar oliy ma’lumotli o‘qituvchi. 13 nafar o‘qituvchilar soatbay va 3 nafar o‘qituvchilar ichki o‘rindosh sifatida faoliyat yuritmoqda. “Xorijiy tillar” kafedrasining deyarli barcha o‘qituvchilari chet tillarini bilish darajalari bo‘yicha xalqaro (TESOL, CEFR) sertifikatlarga egalar.
