Xalqaro hamkorlik bo‘limi

Xalqaro hamkorlik bo‘limi institutning tashqi aloqalarini muvofiqlashtirib, xorijiy ta’lim muassasalari, tadqiqot markazlari, malaka oshirish institutlari bilan hamkorlik aloqalari o‘rnatish maqsadida tashkil etilgan.

Xalqaro hamkorlik tarixi

Markaziy Osiyoda yetakchi va tayanch oliygoh hisoblanmish Toshkent to‘qimachilik va yengil sanoat instituti o‘zining faoliyati davomida mamlakatimiz iqtisodiyotining muhim tarmoqlari – paxta tozalash, to‘qimachilik va yengil sanoat korxonalari uchun yuqori malakali, yetuk mutaxassis kadrlar tayyorlab berish, mahsulot sifati va mehnat unumdorligini oshirish, texnik va texnologik asbob-uskunalarni yangilash bo‘yicha takliflar berib kelmoqda. O‘tgan 90 yildan ortiq vaqt davomida institut katta tarixiy yo‘lni bosib o‘tdi.
Mustaqillik yillarida institutning xalqaro aloqalari kengayish bo‘yicha bir qancha ishlar amalga oshirildi. Xalqaro uyushmalar, Assotsiatsiyalarga a’zo bo‘lish, xorijiy hamkorlikni kengaytirish bo‘yicha alohida topshiriqlar asosida ish olib borildi. Natijada Institut nufuzli xalqaro uyushmalar, Assotsiatsiyalar va xorijiy oliy ta’lim muassasalari bilan hamkorlik aloqalari o‘rnata boshladi. Jumladan, Germaniya, Belgiyaning, Rossiyaning to‘qimachilik universiteti va matbaa universitetlari,Ivanovo Tо‘qimachilik akademiyasi, Kostroma to‘qimachilik universiteti, Gretsiyaning Pirey texnologiya instituti va boshqalar.

Xalqaro hamkorlik bo‘limining asosiy vazifalari:

• Xorijiy mamlakatlardagi oliy ta’lim muassasalari, ta’lim markazlari,Ilmiy-tadqiqot institutlari, oliy ta’limning rivojlantirishga ko‘maklashuvchi davlat jamg‘armalari bilan o‘zaro hamkorlik aloqalarini o‘rnatish;
• Institutimiz va xorijiy oliy ta’lim muassasalari professor-o‘qituvchilarining tajriba almashinuvi;
• Ilmiy konferensiyalar, seminarlar, onlayn rejimida videokonferensiyalar o‘tkazish va xalqaro ta’limni rivojlantirishga ko‘maklashuvchi, jumladan, xalqaro sheriklik munosabatlarini o‘rnatish;
• Yurtimizda faoliyat olib borayotgan xorijiy davlatlarning elchixonalari, tashkilotlari hamda do‘stlik jamiyatlari bilan ta’lim, ilm-fan va innovatsiya sohalarda ham yaqindan hamkorlik aloqalari o‘rnatish;
• Yetakchi xorijiy oliy ta’lim, ilmiy-tadqiqot va axborot-tahlil muassasalari bilan o‘zaro hamkorlikni yo‘lga qo‘yish, hamkorlik bo‘yicha memorandumlar, kelishuvlarni tayyorlash va imzolash, xalqaro hamkorlik yo‘nalishlarini kengaytirish.

Xalqaro hamkorlik bo‘limining asosiy maqsadi

Toshkent to‘qimachilik va yengil sanoat institutining xalqaro maydondagi imijini oshirish, salohiyatini namoyon etish, shu bilan birga xalqaro hamkorlikning yangi marralariga erishish asosiy maqsad qilib olingan.
Xalqaro hamkorlik boʻlimining faoliyat yo‘nalishlari:

• Xorijiy oliy ta’lim muassasalari, ilmiy tadqiqot markazlari va xalqaro tashkilotlar bilan hamkorlik aloqalarini yo‘lga qo‘yish;
• Institut rahbariyati, xodimlari, professor-o‘qituvchilari, ilmiy tadqiqotchilarining xorijiy safarlarini uyushtirish;
• Xalqaro konferensiya, seminar, vebinar kabi tadbirlarni tashkil etish;
• Xorijlik professor-o‘qituvchilarni o‘quv jarayoniga jalb etish;
• Xorijiy talabalar, doktorantlar, ilmiy tadqiqotchilar bilan ishlash;
• Xorijiy delegatsiyalarni kutib olish;
• Talabalarga xalqaro stipendiyalar, grantlar va boshqa o‘quv dasturlari to‘g‘risida muntazam ma’lumotlar berib borish;
• Ilmiy tadqiqotlarni moliyalashtirish manbalarini izlab topish va o‘z vaqtida ommaga e'lon qilish;
• Xorijiy talabalarni institutga jalb qilish;
• Xalqaro reyting agentliklari bilan yaqindan ishlash va institutni kelajakda kuchli 1000 talik ro‘yxatidan joy olishini ta‘minlash bo‘yicha tizimli tadbirlarni amalga oshirish;
• Xalqaro tashkilotlar ekspertlari, xorijiy mamlakatlarning OTM professor-o‘qituvchilari va institutimiz ilmiy xodimlar bilan hamkorlikda grantlarda ishtirok etish;
• Dunyoning nufuzli professor-o‘qituvchilari, ilmiy izlanuvchilari va rahbar xodimlarning dars mashg‘ulotlari, mahorat darslari, hamkorlikda seminar-treninglar, yozgi maktablarni tashkil etish.

Talabalarni akademik almashinuv dasturlari

Talabalarni o‘zaro almashtirish dasturi-bu turli ta’lim muassasalari o‘rtasida talabalarni o‘zaro ma’lum muddatga almashtirish bo‘yicha tuziladigan kelishuvdir. Bu kabi dasturlar oliygoh talabalarini 1 yoki 2 o‘quv semestri davomida xorijda o‘qish imkonini beradi. Talabalar almashinuvi oliygohlar orasida tuzilgan hamkorlik shartnomalari asosida amalga oshiriladi. Bunday dasturlardan ko‘zlangan asosiy maqsad ta’lim sifatini yaxshilash, mamlakatlar o‘rtasida madaniy va iqtisodiy aloqalarni rivojlantirishdan iborat. Talabalarni o‘zaro almashtirish dasturi talabalarning o‘z hisobidan yoki turli dasturlar grantlari asosida amalga oshirilishi mumkin. Talabalar ma’lum muddat boshqa bir OTMda o‘qishi uchun eng katta imkoniyat – talaba almashinuv dasturlari hisoblanadi.
Talabalarni o‘zaro almashtirish dasturi bo‘yicha institutimizda bir nechta xorijiy oliy ta’lim muassasalari bilan hamkorlik joriy etilgan. Germaniyaning Albstadt-Sigmaringen Universiteti, Latviyaning Riga shahridagi Riga texnika universiteti, Xitoy Xalq Respublikasining Changshu institutlilari bilan almashinuv dasturi joriy qilingan.

Xalqaro hamkorlik boʻlimining faoliyati

Hozir kunda Toshkent to‘qimachilik va yengil sanoat instituti 80 ga yaqin xorijiy oliy ta’lim muassasalari va tashkilotlar, assotsiatsiyalar bilan hamkorlik aloqalarini o‘rnatgan. Jumladan, Yaponiya, Xitoy, Koreya Respublikasi, Hindiston, Vyetnam, Malayziya, Belarus, Indoneziya, Misr, Turkiya, Eron, AQSH, Buyuk Britaniya, Latviya, Fransiya, Kanada, MDH mamlakatlarining bir qator nufuzli universitet va tashkilotlari.
So‘nggi yillarda institutimiz bir necha million dollar miqdordagi xorijiy sarmoyalarni olishga erishildi. Jumladan, Yaponiya Hukumatining 4 mln.dollar miqdoridagi beg‘araz yordami tufayli keltirilgan eng zamonaviy o‘quv-laboratoriya jihozlari va uskunalari institutining moddiy-texnika bazasini yanada yangiladi. Mustaqil Davlatlar Hamdo‘stligi mamlakatlarida yagona to‘qimachilik mahsulotlari sertifikatsiya markazi «CENTEXUZ» tuzildi va zamonaviy ravishda jihozlandi. Institut qoshida Koreya hukumatining ko‘magi bilan KOICA tashkiloti qiymati 15 mln. AQSH dollarlik texnopark bunyod etildi.
Joriy yilda institutimiz “AUTEX” to‘qimachilik universitetlari assotsiatsiyasining 47-a’zosiga aylandi. AUTEX bu to‘qimachilik universitetlari assotsiatsiyasi bo‘lib, assotsiatsiyaga butun dunyo bo‘ylab 34 mamlakatdan 47 ta to‘qimachilik universitetlari va institutlari a’zo hisoblanadi. Institutda malakali kadrlar tayyorlash jarayonini yanada takomillashtirish maqsadida chet eldan taklif etiladigan professorlar va mutaxassislar ishtirokida institut xodimlari va talabalar uchun doimiy ravishda seminar, trening va ma’ruzalar tashkil etilib kelinmoqda. Yevropa Ittifoqi tomonidan moliyalashtiriladigan Erasmus dasturlari bo‘yicha institut professor-o‘qituvchilari Yevropaning nufuzli universitetlarida malaka oshirish va ilmiy izlanishlar olib borish, talabalar esa tahsil olish imkoniyatiga ega bo‘lmoqda.

Xalqaro hamkorlik bo‘yicha rejalar

Xorijiy OTMlar bilan ikki tomonlama va ko‘p tomonlama hamkorlikni o‘rnatish, xalqaro agentliklar, jamg‘armalar, xorijiy va xalqaro tashkilotlar bilan hamkorlik qilish, xalqaro hamkorlikni rivojlantirish va qo‘llab-quvvatlash orqali ta’lim, ilmiy tadqiqot va xizmat ko‘rsatish yo‘nalishlarida xalqaro tashabbuslarini targ‘ib qilish, amalga oshirish, talabalar uchun sifatli ta’lim dasturlari va xizmatlarini taqdim etish, xorijiy talabalarning universitet muhitiga moslashishiga ko‘maklashish, ,“El-yurt umidi” jamg‘armasi, “Erasmus+”, USAID, KOICA, GIZ, DAAD dasturlari hamda boshqa tashkilotlar tomonidan ajratiladigan moliyaviy ko‘mak va boshqa xizmatlardan maksimal darajada samarali foydalanishni ta’minlashdir.
Xorijiy talabalarni qabul qilish
Xorijiy talabalar kirish imtihonlarisiz suhbat asosida qabul qilinadi. Xorijiy talabalarga viza va ro‘yxatga o‘tish jarayonida Xalqaro hamkorlik bo‘limi tomonidan amaliy yordam ko‘rsatiladi. Xorijiy talabalar sport bilan shug‘ullanishi uchun institut tomonidan yaratilgan barcha shart sharoitlardan to‘liq foydalanish huquqiga ega. Talabalarga institut kutubxonasiga bepul tashrif buyurish imkoniyati beriladi.Talabalarga o‘quv va ilmiy laboratoriyalarda ilmiy izlanishlar olib borish imkoniyati yaratilgan .

Chet el fuqarolarini talabalikka qabul qilish jarayoni:

Kirish imtihoni suhbat asosida bo‘ladi, abituriyent ushbu davr davomida O‘zbekiston Respublikasiga kelishlari kerak (hujjatlarni topshirish davrida Qabul komissiyasi tomonidan suhbat vaqti aytiladi);
hujjatlar to‘plamini yig‘ish va qabul komissiyasiga topshirish (qabul komissiyasi tomonidan tasdiqlagan muddatda):

1. Ta’lim to‘g‘risidagi hujjatning asl nusxasi (diplom yoki sertifikat) va o‘zbek tilida notarial tasdiqlangan tarjimalar (agar hujjatlar o‘zbek tilida bo‘lmasa);
2. Sog‘liq holati haqidagi tibbiy xulosalar – 086 / shaklidagi sertifikat. Tibbiy hisobot uch oydan oshmasligi kerak. O‘zbek tiliga tarjima qilingan holda (agar hujjat o‘zbek tilida bo‘lmasa);
3. Pasport nusxasi;
4. 6 ta fotosurat (3,5х4,5);
5. Ta’lim olish uchun ariza berish (oldindan to‘ldirish shart emas – Qabul komissiyasida to‘ldirish mumkin) va barcha tegishli hujjatlarni topshirish;
6. Suhbatdan o‘tish;
7. Ta’lim shartnomasi tuzish;
8. O‘qish vaqtida vaqtinchalik ro‘yxatga turish.

Hurmatli xorijiy abituriyentlar!

Xorijiy talabalarning kontrakt narxi O‘zbekiston Respublikasi Oliy va o‘rta maxsus ta’lim vazirligining buyrug‘iga binoan belgilanadi.