Hindiston Respublikasining O‘zbekistondagi Elchixonasi hamda Toshkent to‘qimachilik va yengil sanoat instituti hamkorligida tadbir tashkil etildi.

18-dekabr kuni Hindiston to‘qimachiligining boy merosi hamda zamonaviy tendensiyalariga bag‘ishlangan “Hind to‘qimachiligi va fakturasi” (Indian Textile and Texture) nomli madaniy-kasbiy tadbir bo‘lib o‘tdi.

Mazkur tadbir to‘qimachilik hamda yengil sanoat sohasida xalqaro hamkorlikni mustahkamlashning yorqin namunasi bo‘ldi. Aynan ushbu soha ikki tomonlama munosabatlarda alohida o‘rin tutib, Hindistonning ko‘p yillik tajribasini O‘zbekistonning jadal rivojlanayotgan ishlab chiqarish va ilmiy salohiyati bilan uyg‘unlashtiradi.

Qutlov so‘zi bilan Toshkent to‘qimachilik va yengil sanoat instituti birinchi prorektori Baxtiyor Nasimov hamda Hindiston Respublikasining O‘zbekistondagi Favqulodda va Muxtor Elchisi Smita Pant xonim (Mr. Smita Pant) so‘zga chiqdilar. Shuningdek, tadbirda institutning professor-o‘qituvchilari, talabalar va soha ekspertlari ishtirok etdilar.

Tadbir doirasida an’anaviy va zamonaviy to‘qimachilik mahsulotlari namoyish etildi, faktura, texnologiyalar va dizayn yondashuvlarining o‘ziga xos jihatlari muhokama qilindi, shuningdek, ikki mamlakat o‘rtasidagi akademik va sanoat hamkorligining istiqbollari ko‘rib chiqildi.

Mazkur tadbir madaniy muloqot, bilim va tajriba almashinuvi hamda ijodiy ilhom uchun muhim maydon vazifasini o‘tadi. To‘qimachilik an’analari va sohadagi zamonaviy innovatsiyalarning Hindiston va O‘zbekiston o‘rtasidagi mustahkam hamkorlik ko‘prigi sifatidagi ahamiyatini yana bir bor yaqqol namoyon etdi.