O'zi haqida ma'lumot

Rasulova Mastura Kabilovna. Tug‘ilgan sana 1963-yil, 26 iyun. Ilmiy daraja: Texnika fanlari doktori. Bitirgan ta’lim muassasi 1980-1986 yillarda Toshkent to‘qimachilik va yengil sanoat instituti (injener-texnolog). O‘zi haqida qisqacha ma’lumot: 1963-yil, 26 iyun Toshkent shahrida tavallud topgan. Ma’lumoti – oliy. “Yengil sanoat texnologiyasi” fakultetining «Tikuv buyumlari texnologiyasi» mutaxassisligini 1986 yilda tugatdi. Ishlab chiqarishdagi texnologik jarayonni o‘rganish maqsadida 1986-1988 yillar “Ташгоршвейыт” uyushmasida texnolog lavozimida faoliyat yuritdi. 1988-1992 yillar davomida shu uyushmaga qarashli SPTU-10 (o‘rta kasb hunar texnika kolleji) da o‘qituvchi lavozimida faoliyat yuritdi. 1995 yildan Toshkent to‘qimachilik va yengil sanoat institutining «Tikuv buyumlari texnologiyasi» kafedrasiga stajor tadqiqotchi, 1997 yildan sirtqi bo‘lim aspiranturasiga qabul qilindi. 1996 yildan shu kafedradaning laboratoriya mudiri lavozimida faoliyatini boshladi.

2002 yil nomzodlik dissertatsiyasini himoya qilib, shu yildan kafedrada assistent lavozimida ishlab, talabalarga mutaxassislik fanlari asoslaridan saboq bera boshladi. 2002 – 2006 yillar «Yengil sanoat mahsulotlari texnologiyasi» fakulteti dekanining o‘quv ishlari bo‘yicha dekan o‘rinbosari, 2004 yildan kafedrada dotsent  lavozimida  ishladi. 2006–2014 yillar «Tikuv buyumlari texnologiyasi» kafedrasi mudiri, 2014 yildan dotsent lavozimida  faoliyat yuritdi. 2020 yildan boshlab “Tikuv buyumlarini konstruktsiyalash  va texnologiyasi” kafedrasi mudiri lavozimida faoliyat yuritib kelmoqda.

2021 yil “Maxsus kiyim ekspluatasion ishonchliligini ta’minlash usullarini ishlab chiqish” mavzusida 05.06.04-«Tikuvchilik buyumlari texnologiyasi va kostyum dizayni» ixtisosligi bo’yicha  doktorlik  (DSc) dissertatsiya ishini muvaffaqiyatli himoya qildi.

M.K.Rasulova tomonidan ilmiy ish natijalari asosida 4 ta monografiya, O‘zbekiston Respublikasi intellektual mulk agentligining 8 ta ixtiro va sanoat namunasi patenti, Rossiya Federasiyasining 1 ta patenti, 200 ga yaqin ilmiy maqola chop etilgan bo‘lib, shundan 30 dan ortig‘i nufuzli xalqaro xorijiy jurnallarida, jumladan Scopus, Web of science nashrlarda chop etilgan.  Respublika va chet el xalqaro anjumanlarda ma’ruza bilan ishtirok etilgan.

Uning ilmiy rahbarligida 2 nafar mustaqil izlanuvchi texnika fanlari bo‘yicha falsafa doktori (PhD) ilmiy darajasiga ega bo‘ldi. Hozirgi kunda 1 nafar doktorant va 3 nafar mustaqil izlanuvchi ilmiy-tadqiqot ishlarini olib bormoqdalar.

M.Rasulova xalq xo‘jaligining turli sohalaridagi muammolar yechimiga bag‘ishlangan 1 ta davlat granti hamda 8 ta xo‘jalik shartnomalariga rahbarlik qilgan. Ilmiy tadqiqot ishlari natijalari ishlab chiqarish sharoitida aprobatsiyadan o‘tkazilib ishlab chiqarish texnologik jarayoniga  tadbiq etilgan.

O‘quv yillar davomida oliy ta’lim talabalari uchun 2 ta darslik, 4 ta o‘quv qo‘llanma, kasb-hunar kollejlari uchun mutaxassislik fanlaridan 8 ta o‘quv qo‘llanma chop etilgan. Jumladan, kasb-hunar kollejlari uchun 2006 yilda nashr etilgan “Tikuv buyumlari ishlab chiqarish texnologiyasi” nomli o‘quv qo‘llanma kasb-hunar kollejlari tavsiyasi bilan 2011, 2013, 2014 va 2017 yillarda qayta nashr etildi.

Yengil sanoat kasb hunar kollejlari uchun yozilgan «Tikuv buyumlari ishlab chiqarish texnologiyasi» o‘quv qo‘llanmasi, hamda oliy ta’lim uchun yozilgan «Texnologik jarayonlarni loyihalash» darsligi «Yilning eng yaxshi darsligi va o‘quv adabiyoti muallifi»  Respublika tanlovida g‘olib topilib, 2-darajali diplom va rag‘batlantiruvchi mukofot bilan taqdirlandi.

Professor-o‘qituvchilarning malakasini oshirish, talabalarning amaliy malaka ko‘nikmalarini shakllantirish maqsadida malaka amaliyotlarini tashkillashtirish hamda tajribaviy va ilmiy-tadqiqot ishlarini ishlab chiqarish sharoitida aprobatsiyadan o‘tkazish maqsadida 50 dan ortiq ishlab chiqarish korxonalari bilan hamkorlik shartnomalari tuzishni tashkillashtirdi.  

Bakalavriat ta’lim yo‘nalishlari va magistratura mutaxassisligi bo‘yicha davlat ta’lim standartlari, malaka talablari, o‘quv reja va fan dasturlarini tuzishda doimiy ravishda faol ishtirok etadi.

M.K.Rasulova bakalavriatura talabalari uchun “Tikuv buyumlari texnologiyasi”, «Texnologik jarayonlarni loyihalash», magistratura talabalari uchun “Tikuv buyumlari texnologiyasi nazariy asoslari”, «Tikuv buyumlari ishlab chiqarish korxonalarini loyihalash» fanlaridan ma’ruza, laboratoriya va amaliy mashg‘ulot darslarini olib boradi, kurs loyihasi, diplom loyihasi va magistrlik dissertatsiya ishlariga rahbarlik qiladi.

Institut qoshidagi «Professor-o‘qituvchilarning malakasini oshirish va qayta tayyorlash» tarmoq markazida  kasb-hunar kollej o‘qituvchilariga “Kiyimlarni loyihalashda innovasion texnologiyalar” fanidan ma’ruza va amaliy mashg‘ulot darslarini, oliy ta’lim professor o‘qituvchilariga «To‘qimachilik va yengil sanoat sohasining rivojlanish istiqbollari», “Kiyimlarni loyihalashda innovasion texnologiyalar” bloki bo‘yicha ma’ruza va amaliy mashg‘ulot darslarini olib boradi.

M.K.Rasulova «Ustoz-shogird» tizimi asosida yosh pedagoglar, iqtidorli talabalar va mustaqil izlanuvchilar bilan birgalikda ishlab chiqarish korxonalari manfaatlari yo‘lida amalga oshirilayotgan ilmiy - tadqiqot va tajriba konstruktorlik ishlarini olib bormoqda. 2013 yil VII-Xalqaro sanoat yarmarkasi va kooperatsiya birjasida “Avtokorxona xodimlari uchun maxsus kiyim” kolleksiyasi bilan ishtirok etdi va «Eng yaxshi intellektual mulk ob’ektlari uchun» «Yangi intellekt-2013» tanlovida II-darajali diplom bilan taqdirlandi. 2018 yilda «BEST IP-2018» - eng yaxshi intellektual mulk ob’ekti uchun tanlovining «Eng yaxshi foydali model» nominasiyasi hamda «BEST IP-2022» - eng yaxshi intellektual mulk ob’ekti uchun tanlovining «Eng yaxshi sanoat namunasi» nominasiyasi bo‘yicha g‘olib bo‘ldi. M.K.Rasulovaning ilmiy rahbarligi ostida iqtidorli talaba G.Soipova va M.Tulkunova Beruniy stipendiyasi, bir nechta iqtidorli talabalar institut kengashi va nomdor stipendiya sohiblari bo‘lishdi.

M.K.Rasulova ilmiy rahbarligida magistratura talabasi G.Soipova ishlab chiqarish va texnika sohasi bo’yicha chet tilida tayyorlangan  «Eng yaxshi magistrlik dissertatsiya ishi» Respublika tanlovi g‘olibi bo‘lib, O‘zbekiston Respublikasi oliy va o‘rta maxsus ta’lim vazirligining  III-darajali diplomi bilan taqdirlandi.

M.K.Rasulova Respublika miqyosida o’tkazilgan “Yurt kelajagi” ko’rik tanlovining final bosqichida Respublika viloyatlari va Toshkent shahrida xay’at a’zosi sifatida ishtirok etdi. Bir necha yillar davomida 66-maxsus maktab-internat hamda 4-nogironlar maktabi bolalarini talabalar tomonidan  o’quv amaliyotlarida tayyorlangan kiyimlar bilan ta’minlashni tashkillashtirdi.

Mustaqillik yillarida o’quv – ta’lim va fan sohalarida kafedraning xalqaro hamkorlik aloqalari kengaydi. M.Rasulova Angliyaning London moda kollejida malakasini oshirib, Britaniya kengashi yordamida INSPIRE (Oliy ta’lim bilan hamkorlik) dasturi asosida London Moda kolleji bilan institut o‘rtasida tuzilgan hamkorlik loyihasining asoschisi bo‘ldi. Shuningdek, «O‘quv dasturlarini takomillashtirish va bitiruvchi talabalarda ishga joylashish hamda ish joylarini tashkil etish ko’nikmalarini shakllantirish» yo‘nalishidagi loyiha ikki tomonlama manfaatdor ta’lim muassasalarining professor-o’qituvchilari va talabalarining kasbiy mahoratlarini yanada oshirishga xizmat qildi.

M.K.Rasulova Qozog‘iston Respublikasi Almata texnologiya universiteti magistrlariga ilmiy stajirovkalarini TTYSI kafedra qoshida tashkil etish va ularga ilmiy raxbarlik qilish bo‘yicha ish olib boradi. Bundan tashqari turdosh oliy ta’lim muassasalaridan Namangan muhandislik texnologiya instituti, Buxoro muhandislik texnologiya instituti, Jizzax Politexnika instituti, Termiz muhandislik texologiya instituti, Qarshi davlat universiteti professor-o’qituvchilari va magistrlari bilan hamkorlikda ilmiy va ilmiy-uslubiy ishlar olib boradi.

M.K.Rasulova 2012-2019 yillar davomida Davlat Test markazining Xorijiy davlatlarda ta’lim olganlik to‘g‘risidagi hujjatlarni nostrifikasiyalash bo’yicha “Qishloq xo’jaligi, muxandislik, ishlov berish va qurilish tarmoqlari” sohasi ekspert komissiyasi a’zosi sifatida faoliyat olib bordi.

M.K.Rasulova “Ko‘p yillik samarali va halol mehnati, hamda o‘z xizmat vazifasiga sadoqati uchun” O‘zbekiston Respublikasi Oliy va O’rta maxsus ta’lim Vazirligining Faxriy yorlig‘i bilan mukofotlandi. O‘zbekiston Respublikasining
30 yillik yubileyi munosabati bilan «O‘zbekiston Respublikasi mustaqilligining 30 yilligi» esdalik nishoni bilan taqdirlandi.