Mexanika muhandisligi kafedrasi

Mavlyanov Aybek Palvanbayevich

Kafedra mudiri

Manzil: Toshkent shahri Shohjahon ko‘chasi 5-uy

E-pochta: a.mavlyanov@ttysi.uz

Telefon: +998(88)-008-82-01

O'qituvchilar: 33

Murojaat yuborish

O‘zi haqida ma’lumot

Mavlyanov Aybek Palvanbayevich 1982-yil 22-martda Qoraqalpog‘iston Respublikasi Ellikqal’a tumanida ziyoli oilada tug‘ilgan.

2002-yili Toshkent to‘qimachilik va yengil sanoat instituti “Tabiiy tolalarni ishlab chiqarish texnologiyasi” ta’lim yo‘nalishi bo‘yicha bakalavriaturani, 2004-yili Toshkent to‘qimachilik va yengil sanoat instituti “Paxtaga dastlabki ishlov berish” mutaxassisligi bo‘yicha magistraturani imtiyozli diplom bilan tugatgan.

2008-yildan Toshkent to‘qimachilik va yengil sanoat institutining “Mehnat muhofazasi va ekologiya” kafedrasida katta laborant lavozimida ish boshlagan.

Uning 150 dan ortiq ilmiy ishlari e’lon qilingan: 3 ta monografiya (1 tasi xorijda) va 40 ta ilmiy maqola hamda 90 dan ortiq tezislari nashr etilgan, 6 ta ixtiro va 6 ta foydali modelga О‘zbekiston Respublikasi patenti, 1 ta foydali modelga xorijiy patent (Rossiya Federatsiyasi) va 1 ta EHM dasturi uchun guvohnoma olingan. Yangi darsliklar, o‘quv-uslubiy qo‘llanmalarni chop etishda ham faol qatnashib kelmoqda. Shu kungacha 1 ta darslik va 4 ta o‘quv qo‘llanmasi chop etilib, o‘quv jarayonida keng foydalanilmoqda.

2016-2017 yillarda Yo-А-3-3 “Paxtani qayta ishlash texnologik mashinalarining yuqori samarali ta’minlagich konstruksiyasini ishlab chiqish va nazariy-tajribaviy tadqiqotlar asosida parametrlarini asoslash” mavzusidagi davlat grantiga rahbarlik qilgan.

U faoliyati davomida yuqori natijalarga erishib kelmoqda. 2016-yilda yoshlarning “Innovatsion g‘oyalar” respublika ko‘rik-tanlovi g‘olibi bo‘lgan.
2018-yilda falsafa doktori (PhD) ilmiy darajasi, 2021-yilda dotsent va 2024-yilda professor ilmiy unvonini oldi. U institutda yosh olimni tayyorlagan eng yosh olimdir, 2023-yilda uning ilmiy rahbarligida A.A.Abdusamatov texnika fanlari bo‘yicha falsafa doktori (PhD) dissertatsiya ishini muvaffaqiyatli himoya qildi. Shuningdek, u institutdagi eng yosh professor bo‘lib hisoblanadi.

Uning ilmiy rahbarligida ketma-ket 5 marta davlat stipendiatlari va 3 marta respublika fan olimpiadasi g‘oliblari yetishib chiqdi. Jumladan, 2018/2019 o‘quv yilida Firdavs Istamov, 2019/2020 o‘quv yilida Shaxnoza Xaytbayeva, 2020/2021 o‘quv yilida Muslimbek Hamrayev, 2021/2022 o‘quv yilida esa A’lamjon A’zamjonovlar Beruniy nomli Davlat stipendiasi sohiblari bo‘ldi. 2022/2023 o‘quv yilida esa uning qo‘l ostida bilim olgan Nargiza Xaydarova Islom Karimov nomli Davlat stipendiatligiga erishdi.

Mavlyanov Aybek Palvanbayevich 2024-2025 o‘quv yilidan boshlab “Mexanika muhandisligi” kafedrasi mudiri lavozimida ishlab kelmoqda.

KAFEDRA TARIXI

“Mexanika muhandisligi” kafedrasi 2024-yil 3ta kafedraning transformasiyasi natijasida “Texnologik mashinalar va jihozlar” kafedrasi negizida tashkil etilgan. “Texnologik mashinalar va jihozlar” kafedrasi ilk bor 1956-yil “Tolali materiallarni dastlabki ishlash” fakulteti qoshida tashkil qilingan bo‘lib, shu yili kafedraning kunduzgi bo‘limiga dastlabki talabalar qabul qilingan.
Kafedraning asoschisi-professor, texnika fanlari doktori (t.f.d.) G.I.Miroshnichenko hisoblanadi. U kafedrada aspirantura yo‘nalishini ochgan hamda paxta tozalash va to‘qimachilik mashinalari mexanikasi bo‘yicha ilmiy tekshirish ishlarini yo‘lga qo‘yib, ilmiy-pedagogik kadrlarini tayyorlash orqali o‘zining ilmiy maktabini yaratgan.
P.N.Tyutin, T.X.Xakimov, G.D.Selivanova, M.G.Xamov, U.S.Mirsagatov, E.Usmonov, E.M.Abdurazzoqov, R.G.Mahkamov, P.T.Mahkamov, M.M.Shukurov, R.R.Fayziyev, G.A.Qurbanovalar kafedraning birinchi o‘qituvchilari hisoblanadi.
1959-yildan hozirgi davrgacha “To‘qimachilik sanoati mashina va apparatlari” mutaxassisligi bo‘yicha hamda 60720700 – “Texnologik mashinalar va jihozlar (to‘qimachilik, yengil va paxta sanoati)”, 5320300 – “Texnologik mashinalar va jihozlar (yengil sanoat)” ta’lim yo‘nalishlari bo‘yicha 5000 dan ziyod bakalavrlar, 70720709 – “To‘qimachilik va yengil sanoati mashina va apparatlari” va 70720711 – “Paxta tozalash sanoati mashina va jihozlari” mutaxassisliklari bo‘yicha 300 ga yaqin magistrlar tayyorlangan. Avvalgi aspirantura va hozirda doktorantura bosqichida o‘qib, kafedra o‘qituvchilari rahbarligida ilmiy ish olib borgan izlanuvchilarning fan nomzodligiga ega bo‘lganlari soni 90dan ziyodni tashkil qilgan.
Kafedrada ishlab o‘tgan hamda ishlayotgan o‘qituvchilar - G.I.Miroshnichenko, P.N.Tyutin, M.G.Xamov, R.G.Maxkamov, S.S.Xodjayev, R.R.Fayziyev, A.A.Ismoilov, S.X.Babajanov, A.A.Safayev, R.X.Rosulov, SH.SH.Xakimov va boshqalar tomonidan 100 dan ortiq darslik, o‘quv qo‘llanma va monografiyalar nashr etilgan.
Kafedra dotsenti Z.O.Maxammadiyev 2018-yilda Rossiya Federatsiyasining Moskva Davlat universiteti hamda Kostroma Davlat universitetlarida mutaxassisligi bo‘yicha stajirovka o‘tab kelgan.
Kafedra dotsenti M.M.Agzamov 2018-yilda “Seminar on Textile and Garment Industry Planning for Developing Countries in 2018” nomli seminar-trening bo‘yicha Xitoy Xalq Respublikasida malaka oshirib kelgan. 2023-yil ITEC dasturi bo‘yicha Hindistonning Uttar Pradesh shtatida joylashgan NOIDA shahridagi Times Professional Learning (Bennet University) universitetida malaka oshirib kelgan.