Suhbat chogʻida talabalar dars payti va undan keyingi boʻsh vaqtlarini samarali oʻtkazish va band boʻlishga qaratilgan takliflarini berdilar:

• Dizayn va tikuvchilik yoʻnalishlarda tahsil olayotgan talabalar uchun darsdan keyin toʻgaraklar tashkil etish;
• Ozodalik va saranjomlikni saqlash uchun oʻquv binolarida garderob tashkil etish;
• Modalar namoyishida ishtirok etayotgan talaba-qizlarni moddiy ragʻbatlantirish va qoʻllab-quvvatlash takliflari berildi. 

Shuningdek, talabalar turar joyida istiqomat qiluvchi yoshlarning fikr va takliflari ham oʻrganildi. Ularning eng dolzarblari qayd etilib tez orada barcha ijobiy hal etilishi taʼkidlandi.

Ochiq muloqotlar davom etmoqda.

Yengil sanoat va dizayn texnologiyasi fakulteti talabalari murojaatlari va takliflarini amaliyotga tatbiq etish hamda oʻrganish maqsadida ishchi guruh oʻz faoliyatini boshladi.

Bugun esa xuddi shunday uchrashuv Toʻqimachilik sanoati texnologiyasi fakulteti talabalari bilan ham oʻtkazildi.

Suhbat chogʻida talabalar “Qalqon” guruhi va uning faoliyatini isloh qilish, guruh aʼzolarini ragʻbatlantirish, institutda yangi ochilayotgan taʼlim yoʻnalishlarining targʻibotiga volontyorlarni jalb etish, biznes forumlar tashkil etish kabi takliflarni berishdi.

“Kecha boʻsh vaqtimni mazmunli oʻtkazaman, dugonalarimga tikishni oʻrgataman, degan qizimizga rektorimiz ikkita tikish mashinasi va bitta dazmol bilan toʻgarak ochib berdilar. Har kun bolalarimdan xabar olinglar, degan topshiriqlari ham bor.

Muloqotimizga hech kim aralashmaydi — hurmatli dekan va professor-oʻqituvchilar, marhamat, xonani tark eting! Qani yoshlar, soʻz sizga!”

Baxtiyor Nasimov, TTYSI birinchi prorektori.

Qodirov Firdavs Fahriddin Oʻgʻli 5a-21 guruh talabasi:

– Bizga keladigan jihozlar qoʻllanmasi asosan ingliz yoki koreys tilida boʻladi. Ingliz tilini esa faqat birinchi kursda oʻqiymiz. Sababi urgʻu asosan mutaxassislik yoʻnalishlariga beriladi. Toʻrtinchi kursgacha uzluksiz ravishda ingliz tili darslarini tashkil etishning iloji bormi?

Baxtiyor Nasimov, TTYSI birinchi prorektori:

– Siz oʻqiyman, desangiz biz albatta sharoit yaratamiz. Tez fursatda siz va siz kabi qiziquvchan va talabchan talabalar uchun sohaga yoʻnaltirilgan ingliz tili toʻgaraklari tashkil etiladi. Darslar mutlaqo bepul. Shunchaki suhbat yoki grammatika qonun-qoidalarini emas, balki sohangizda asqatadigan soʻzlarni oʻrganasiz.

7a-21 guruh talabasi, Dadaboyev Zayniddin Ishok oʻgʻli:

– Qurilish sohasi mahsulotlari savdosi bilan shugʻullanaman. Qoʻlqoplarga talab katta ammo yetkazib beruvchi asosan Xitoy. Xuddi oʻsha sifatga ega mahsulot chiqarish uchun maxsus qoliplarni olib kelish kerak. Institutda buning iloji bormi?

Baxtiyor Nasimov, TTYSI birinchi prorektori:

– Xabaringiz bor, yaqinda oʻz brendimiz boʻladi. Institut nafaqat kadrlarni, balki oʻsha kadrlar kabi yuqori sifatga ega mahsulotlarni ham ishlab chiqarishni boshlaydi. Ishlab chiqarish doirasida qoʻlqoplarni ham toʻqish niyatimiz bor edi.

Siz tilga olgan qoliplarni olib kelishga albatta harakat qilamiz. Agar ishlab chiqarish jarayoni samarali yoʻlga qoʻyilsa, uning ustida aynan siz kuratorlik qilishingizni istayman. Kelishdikmi?

– Kelishdik!